Бүгд Найрамдах Социалист Вьетнам Улсын нийгмийн хамгаалал хөдөлмөрийн дэд сайд, Вьетнамын нийгмийн даатгалын газрын дарга ноён LE BACH HONG, ВНДГ-ын дэд дарга хатагтай DO THI XUAN PHUONG тэргүүтэй зочид төлөөлөгчид өнөөдөр НДЕГ-т зочиллоо. Зочид төлөөлөгчид 2012 оны 07 дугаар сарын 22-ноос 28-ны өдрүүдэд харилцан туршалага судлах айлчлал хийж байгаа юм. Олон жилийн найрамдалт харилцаатай манай хоёр улс “Нийгмийн хамгааллын салбарт хамтран ажиллах тухай санамж бичиг”-т 2006 оны 12 дугаар сарын 6-ны өдөр гарын үсэг зурж байсан түүхтэй. Түүнээс хойш санамж бичгийн хүрээнд харилцан туршлага солилцох, танилцах арга хэмжээг ийнхүү 9 дэх удаагаа зохион байгуулж байна.
2008 оны 09-дүгээр сард БНСВУ-ын Нийгмийн даатгалын газрын дарга ноён HUY BAN тэргүүтэй төлөөлөгчид манай улсад айлчлах үеэр Нийгмийн хамгааллын салбарт хамтран ажиллах тухай санамж бичигт нэмэлт өөрчлөлтүүдийг оруулж, анхлан байгуулсан санамж бичгээ шинэчлэн үзэглэсэн юм. Энэ удаагийн туршлага судлах айлчлалын хүрээнд хоёр тал нийгмийн даатгалын тогтолцоонд гарч байгаа шинэчлэлтүүдийг харилцан сонирхож, мэдээлэл солилцлоо. Уулзалтын үеэр Монгол улс суурь, шимтгэл, нэмэлт тэтгэвэр гэсэн гурван давхаргат нийгмийн тэтгэврийн тогтолцоонд шилжих тухай яригдаж байгаатай уялдуулан хийгдэж байгаа ажлуудаа танилцууллаа. Мөн уулзалтын хүрээнд хоёр улс тухайн оронд хөдөлмөрлөж буй ажиллах хүчээ нийгмийн даатгалд бүрэн хамруулж, нийгмийн баталгааг нь хангахад харилцан анхаарч ажиллах зэрэг бодлогын чанартай асуудлуудыг хөндөн ярилцсан юм.
